民團:TOCC兩系統無整合資訊 疫調恐驚落勾

予防疫單位了解確診者的相關行蹤、接觸史的TOCC系統。目前有法定傳染病通報系統、佮簡訊實聯制這兩个。毋過有醫療團體指出，確診者可能會四界行踏，著靠縣市政府互相通知，上驚會落勾去，希望中央設法改善。

醫療相關聯盟初5佇面冊貼文表示，目前記錄確診者的旅遊史、接觸史、職業佮群聚信息的TOCC風險評估機制，包括法定傳染病系統佮簡訊實聯制兩个系統，但是目前會當透過傳染病系統知影訊息的，干焦有通報確診者的縣市政府、佮確診者蹛的縣市政府，若是確診者走去別的縣市做工課等等，遮的縣市其實無法度知影。

醫勞盟理事林秉鴻表示，「上有名的例就是恩主公彼案，因為伊是迒縣市的工課，求醫佮徛厝，因為三級就無真正限制逐家走徙，所以病患已經確診，會使予全國攏知影，尤其是衛生局、相關單位，抑是院所攏知影是有較好。」

聯盟講，目前兩个TOCC系統的資訊，著靠知影資訊的縣市、主動通知其他縣市。毋過既然資訊攏佇中央手頭，照理應該由中央政府整理了後，發送予相關縣市的衛生局。一个縣市傳一个縣市，恐驚有落勾抑是延延的問題。

醫勞盟理事林秉鴻講，「逐家攏自動化、電腦化矣，佇問診的時陣就會使有一个藍圖，一个骨幹先出來，若是愛自頭到尾按呢問落來，就真開時間。」

聯盟講，TOCC是疫情當中，上重要的資料，希望行政院的唐鳳政務委員會當想辦法解決這个問題。記者聯絡唐鳳，但是唐鳳猶未提出回應。聯盟講，希望唐鳳會使來說明，這个技術是毋是有困難、所以無法度來做，無若會疫情以來遐爾久，攏無法度來改善。