臺鐵非前線人員通注射? 產業工會指名單做手

交通部宣布，國內第一線運輸人員，7月初5開始注疫苗。毋過台鐵產業工會7/3搤講，有一寡毋是前線的員工，甚至閣有請育嬰假的人嘛佇名單內。面對這項指控，台鐵局回應講，會照必要性排順序，分批注射。

周末的南港車站，車頭是冷冷清清，毋過因為車站的工作人員也算是高風險族群，交通部宣布包括台鐵、高鐵 、航空站等等第一線服務人員，計共15萬人，佇7月初5開始注預防射。

毋過台鐵產業工會表示，有員工反映毋是第一線的行政人員，和請長假的員工竟然佇名單內，批評疫苗分配根本烏箱作業，甚至閣有車站抽剾仔決定順序。

台鐵產業工會秘書長魏豫綾說，「同一个時陣有發現一寡一等站，其他站別可能攏有七十幾筒，毋過有一寡站只有五十幾筒的這个問題，阮也希望台鐵會當趕緊說明 ，千萬毋通烏箱作業。」

根據台鐵規劃，有注疫苗需求的人計共1萬8518个，其中從業人員1萬6065人，協力廠商2453人，不過頭一批配著的疫苗干焦夠注1萬2千人，所以優先予第一線工作人員，包括列車乘務人員、清潔人員和關鍵基礎設施佇四級和三級警戒，維持營運的人員，照順序注，臺鐵局發文表示，第一波注射名單以四級和三級警戒必要人員為主，確保台鐵正常運轉，其他人員會安排第二批注。交通部表示會繼續積極爭取疫苗，予紲落來猶未注的人攏會當冗早注著。