有醫生提醒面對閣較傳染的delta變種病毒，若對外口轉去厝進前，消毒工課愛做予十全，另外嘛提供居家防疫十大重點，予民眾知影。
新冠肺炎DELTA變種病毒入侵台灣，面對疫情的變化，醫生提醒逐家，除了愛定定洗手、掛喙罨來降低風險，嘛愛配合運動來提升免疫力，原則上這改病毒會使佇一般無生命的表面上，活6~9工，所以清潔的工作絕對袂當輕忽（khin-hut）。
東元病院兒童心臟科主任賴俊維表示，「首先愛注意的所在是鞋仔，鞋仔盡量褪外口，若是入去室內，嘛愛注意鞋仔下跤的消毒，身軀頂的衫褲盡量較早褪落來換洗，仝時陣嘛愛注意頭鬃、面佮身體，盡量嘛是去洗頭洗面。」
賴俊維本身是醫師嘛是三个囡仔的爸爸，伊講家己轉去厝第一件代誌，一定會去洗面，規身驅嘛會洗清氣，另外伊嘛提出防疫閣有十大重點。
東元醫院兒童心臟科主任賴俊維講，「捷洗手、掛喙罨、保持社交距離、鞋仔囥門外口，遛喙罨、褪護目鏡著細膩，喙罨直接擲掉，去人濟的所在轉來愛洗身軀，洗面洗頭，室內保持通風，較緊注疫苗。」
賴悛維講自我防疫的工課是真重要的代誌，自生活細節開始做起，才會使避免共病毒紮轉去厝內。另外若是有定期回診的需求，嘛會使盡量利用遠距視訊門診，來降低感染的風險，保護家己嘛保護逐家。