嘉義市分流借冊.2個月免還 鼓勵歇熱佇厝學習

為著予學生佇歇熱的時陣,會當繼續學習,嘉義市內的學校開放校園內面的公共空間成做借冊的所在,毋但有管制人數、也有增加借冊的時間佮數量,予學生囡仔佇歇熱期間,會當配合防疫、佇厝裡學習。

學生抱著冊,家己佇櫃台來辦理借冊的手續,學校開始來歇熱,嘉義市的國小鼓勵學生歇熱期間,會當提高借冊的數量佮時間,配合防疫佇厝加看冊。配合防疫的要求,室內空間袂當超過5人,學校運用目前注疫苗的方式來共學生做分流。透過電子化的設備,學生家己就會當來借冊還冊。

家長周小姐:「安全考量上重要 ,重要的是罕得會當一改借到十本冊,因為平常時囡仔無法度借著遮濟冊。」

嘉義市蘭潭國小學生龔同學VS.記者:「這馬就是疫情誠嚴重 ,(所以你感覺愛分流來借冊),是,(你拍算欲借幾本冊),十本冊。」

市政府教育處表示,市內的學校攏有運用家己的空間,安排學生來學校的圖書館借冊。

嘉義市蘭潭國小校長邱榮輝:「佮這个宇美町式的注射方式是誠類似,所以搝長距離,速度嘛加較緊,所以佇防疫的期間是閣較安全的借還冊方式。」

有家長嘛表示,已經開始歇熱,分流的方式予in tshuā囡仔來較安心,而且冊一改會當借兩個月,毋但方便嘛予囡仔會當好好來看。

相關新聞

專題|全台敬老金大調查