疫情衝擊各行各業，占全國產量八成的屏東泰國蝦嘛敗市，漁民個外月以來，攏無出貨，萬外斤的泰國蝦，一直飼佇塭仔、毋敢掠，漁民希望政府協助揣通路，屏東縣農業處表示:會想辦法鬥銷，嘛已經建議中央，專案的補助辦法。
漁民拋網掠起來的泰國蝦，大部份攏已經會當出貨矣，煞拄著疫情嚴重，全國餐廳、釣蝦仔場停業，遮的泰國蝦賣袂出去，只好一直飼佇塭仔內。
潮州鎮水產養殖協會理事長王榮良:「業者袂曉賣蝦仔，除了網路賣一寡，賰的就無矣，網路欲賣，你像宅配閣寄袂出去，新竹以北爆滿，有訂單送袂出去足費氣。」
屏東縣農業處長鄭永裕:「目前用屏安箱平台引進一寡加工的，包括煠好的泰國蝦，冷凍泰國蝦銷售，初步成績慢慢出來。」
屏東潮州鎮水產養殖協會理事長王榮良:「政府若有法度幫助阮補助，欲冷凍的，阮這款無養殖登記證的，阮這馬一直辦，費用懸，看會當補助無。」