全國改線頂教學 各科老師激頭腦舞直播

防疫停課期間，老師嘛真無閒。全臺的學校這馬因為疫情停課，大部份攏改線頂上課，高雄有國小逐工按照課表上課，連運動課老師嘛愛透過電腦，佮學生做伙活動筋骨，甚至家長嘛會加入。嘛有幼稚園老師，逐工翕教學影片囥佇網路，予家長會當佮囡仔做伙看。
 
教室內底攏無人，老師面對鏡頭，喝口令、做運動，曹公國小這班學生，攏佇家己厝內做伙活動。

厝內大人嘛佮囡仔做伙耍，有的囡仔peh去眠床頂，嘛做了真歡喜，自從宣佈停課，曹公國小就改線頂上課，連運動課嘛愛上，拄開始的時陣，體育老師真煩惱毋知影欲按怎上課。
 
雖然停課，曹公國小準備九間直播教室，逐工按照原底的課表，老師就親像直播主持人，嘛會不時佮學生互動。
 
毋但有老師逐工做直播主上課，這陣幼稚園老師，逐工嘛咧學習翕影片、做網路紅人。
  毋但教拗紙、做耍物仔佮囡仔做伙耍，閣有講故事。前金幼稚園老師分組，逐工攏會翕新的活動影片，會當予爸母陪伴囡仔，這馬全台停課閣延兩禮拜，老師猶是希望學生會當趕緊轉來學校上課。