嘉義大學生發起遊行 望教育部擋稻江停辦計畫

嘉義稻江管理學院進前傳出欲停辦,稻江的學生煩惱教育部答應予in「原校畢業」可能是假,決定家己徛出來;包括中正、南華、嘉義等等在地大學的學生,甚至教師代表,今仔日聯合遊行來到縣政府,除了要求教育部愛照品照行,也希望嘉義縣政府會當出面,協助保障學生的權益。

學生佮老師組成的遊行隊伍,搝布條沓沓仔行來縣政府。來自嘉義地區的大學學生代表,佮臺灣學生聯合會、高教工會等等關心受教權的團體,今仔日攏來到嘉義聲援稻江的師生,希望教育部慢且同意稻江的停辦計劃。
 
稻江科技暨管理學院梁老師:「學校到今閣有教職員共學生講,講稻江欲申請停辦攏是教育部害的,董事會其實嘛是真無辜,嘛有老師共學生講,如果恁參加今仔日的遊行,恁就會無法度畢業,千萬袂當參加。」
 
稻江科技暨管理學院黃同學:「我這馬是二年,如果學長姐畢業了後,阮大概就賰十外人到二十外人左右,我是希望會當原校畢業,如果真正無法度,至少教育部愛有安置的作業。」

嘉義縣私立稻江管理學院,舊年雄雄宣布欲停辦,但是去予教育部阻擋了後,今年4月董事會閣重新申請今年欲來停辦。今仔日來聲援的團體就表示,希望教育部會當遵守當初的承諾,嘛希望嘉義縣政府會當出面協助。
 
高教工會組織部主任林柏儀:「政府應該要連鞭出面介入,阻擋稻江,駁回in這馬所申請的停辦計劃  ,保證現此時師生的權益,最後予校產回歸公共使用。」
 
臺灣學生聯合會理事長蔡一愷:「頭拄仔老師有講著,稻江的財務狀況根本無問題,In憑啥物提這老師、國家、民眾所提供的國有財產 ,去做in家己趁錢的事業佮工具。」
 
稻江今年四年仔的學生畢業了後,二、三年的學生只賰七十外人,In 會去予犧牲。稻江校方回應講,停辦計劃佇教育部正式決定前進,會繼續來辦學,保障師生的權益。縣政府是講私立大學目前依法受教育部監督,校產管理的問題,會配合教育部最後的決定,才閣進行研究。

相關新聞

專題|全台敬老金大調查