避免食著瘦肉精 學者:擴大國產豬經濟規模

今年起,開放美國帶瘦肉精的豬肉、進口臺灣,現時國內敢有?業者掛保證,強調這陣臺灣、都無豬肉有瘦肉精,有學者認為、擴大國內飼豬產業的、經濟規模,降低進口需求,也會當降低食著瘦肉精的風險。

貨車出出入入,進口的冷凍豬肉,準備送去加工廠加工。

對今年開始,出貨進前,箱仔頂頭攏愛貼紙,註明廠號,標示看敢有精肉精。

進口商李春來頓胸坎掛保證,強調這馬根本無萊克多巴胺的豬肉入來,伊也講遮對美國、西班牙、荷蘭、丹麥來的貨,攏是舊年九月進的,到今已經銷八成外,庫底賰三、四千噸,伊講這馬因為疫情無貨櫃,加上萊豬議題猶佇風火頭,啥物時陣會閣進,無時間表。

進口商強調食著美豬的機會誠低,不過台灣猶是有一成必須倚靠進口,加拿大進上濟 主要進胛心肉、lòo-sirh(里肌)、腰內肉、後腿和前腿,腹內以豬跤、肝連、大腸為主,以加拿大和美國佔上濟。雖罔進口商表示這馬進美國豬嘛銷無路,抑若是加拿大豬肉委員會捌聲明出口的豬肉攏袂使用精肉精,不過國內已經開放萊豬合法進口,咱就猶是有食著的可能。

專家認為透過擴大國內豬場的經濟規模,增加國產豬產量,就較有機會降低國人食著萊劑的風險。

中華民國養豬協會理事長 楊杰
本來咱國內就是以國產肉為主
這个體系差不多有七成外以上
所以咱愛穩定這个系統
咱愛予咱的消費者
對咱的國產豬肉閣較有信心

因應萊豬開放,政府講欲提百億基金建立完善的屠宰分級制度佮冷凍供應鏈設備等措施,雖罔豬農和學者攏認為愛穩定國內養豬規模,不過in嘛煩惱未來美國若和台灣簽BTA,關稅沓沓仔降低,台灣的養豬規模可能無法度避免受衝擊,甚至重新洗牌嘛無一定。

相關新聞

專題|全台敬老金大調查