業者欲佇屏東石頭營種電 文史人士呼籲停工

二戰時期日軍佇屏東枋寮起一个石頭營，這陣光電業者欲開發，有文史團體、出來阻擋，強調愛保留這塊土地。文史團體今仔閣再表示，當時日軍會利用假墓佮假廟，當做石頭營的出入口，呼籲光電業者著愛趕緊停工。

行過山坡這片果子園，雄雄出現一个破破舊舊的石頭墓，兩个人做伙共墓牌前的蓋拍開，其實遮是石頭營的一个出入口。

文史人士佮議員tshuā民眾來甲遮搬戲抗議，這位假扮美軍的英國人David，伊蹛佇台東，對全世界二戰遺跡(uî-tsik)誠有興趣，伊看過枋寮石頭營了後，嘛希望政府愛保留。

這个假墓干焦會當予一个人軁（nǹg）入去，下底的地陷因為有所在已經崩去，賰短短三十米，附近閣有另外一座土地公廟，內底嘛藏一條通道。

根據林炫耀這四冬的調查，石頭營有64位軍事建築，範圍誠大，目前屏東縣政府的文資調查猶未煞，毋但有假墓假廟，內底日軍起的地陷，誠長嘛誠深，親像是迷宮，會當通去無仝的機銃堡。

關心文史的民眾喝口號，希望投資光電業者暫停，David嘛講伊想欲開國際記者會，予全世界知影，台灣有遮爾完整的二戰遺跡。