死刑犯邱和順坐監32冬 "海旺天光"聲援


有冤、無地訴,受壓迫閣是啥物款的感覺?蔡瑞月舞蹈研究社、的舞蹈家詹天禎佇聲援死刑犯、邱和順的展覽「海旺天光」,利用舞蹈表演、ﰓ眾人了解。

舞者規身軀予紅紗罩牢牢,拚勢傱猶是傱袂出司法不公義佮社會偏見的網羅。蔡瑞月舞蹈研究社的舞蹈家詹天禎用舞蹈表現死刑犯邱和順的處境。伊講上代先透過媒體了解這个案件,難免未審先判,後來參與民間的聲援行動,發見認定邱和順有罪的講法有真濟矛盾,警察刑求的證據閣誠明確,投入聲援愈深,就愈痛苦。

民間司改會、台灣人權促進會聲援坐監32冬的死刑犯邱和順,邀請民眾透過藝文體驗,了解司法邱和順的遭遇。

現場晟隔出土城看守所接見室予民眾體驗。毋但是小名海旺的邱和順等待天光,這堵壁紹介的案件,閣有已經予銃決的,佮已經洗清冤情的故事。這三、四冬對死刑關頭陸續平反的鄭性澤、徐自強,嘛參加聲援。

邱和順1988年予警方指控殺害新竹學童陸正佮保險業務員柯洪玉蘭。2011年法院判死刑確定。毋過民間真濟團體替伊喝冤枉。想欲了解案情的民眾會使佇18號進前,來台北市的濕地藝文展覽廳參觀。

全台敬老金大調查

相關新聞