"打狗亂歌團"嚴詠能 為土地走唱超過20冬 - 公視新聞網

"打狗亂歌團"嚴詠能 為土地走唱超過20冬


打狗亂歌團的主唱嚴詠能,伊是一位臺灣走透透的歌手。長久以來,伊也佇恆春、陪老人囡仔彈琴唱歌,培養少年團員。團員表示,臺灣歌曲的創作,這條路嚴詠能已經行超過二十冬,嘛一直咧學習。

雖然無配音樂,歌聲蓋溫暖,寫的是萬丹的紅豆仔,這嘛是嚴詠能最後的創作。

當初是許展維拜託伊寫一條萬丹紅豆的歌,按算5號佇萬丹舞台發表,想袂到嚴詠能突然過身。踏入音樂創作超過20冬,對愛河邊做街頭藝人開始,嚴詠能定定揹一支吉他,唱的攏是對台灣、對土地的感情佮故事。
 
外號「ㄉㄨㄞ ㄉㄨㄞ」的王煌鵬,自少年開始綴嚴老師已經14冬,伊永遠會記得十年前專輯提著金曲獎的時,老師不是tshuā 逐家去慶祝,顛倒tshuā in去做田。

其實誠濟人毋知影,嚴詠能這幾冬嘛tshuā團員去恆春陪阿公阿媽佮囡仔彈月琴、唱歌謠,有時嘛會去幼稚園教囡仔唱台灣歌。

今年金曲獎入圍四項,原住民創作歌手戴曉君,嘛是伊的徒弟,伊真感謝「師的」教伊按怎唱出故鄉的故事。

佇台灣,非主流創作的歌手這條路無簡單,毋過,嚴詠能在生猶是堅持逐禮拜寫歌。

嚴詠能定定講,半暝攏有歌靈走來夢中,才會當寫出遮爾濟歌曲,團員傳承伊的精神,嘛希望這馬伊變做歌神,守護家人朋友。

相關新聞

留言區