雲林愛無礙協會出門表演 歕口琴陪伴遊客賞花
發布時間：
更新時間：
雲林縣愛無礙協會，長期咧關心身心障礙者，逐年攏會舉辦活動。今年協會的成員也去到四湖鄉做公益演出，希望優美的音樂，也會當分享予逐家。
看過去，紅的、粉紅的、猶格有白的孤挺花，開了滿四界，因為孤挺花，拄好佇媽祖生前後開，所以也有人叫伊媽祖花，來雲林縣四湖鄉長春園藝孤挺花園，看花的民眾，照相機直直翕，邊仔猶閣有人咧歕口琴。
雲林縣愛無礙協會的車隊，今年來到雲林縣四湖鄉公益演出，希望用音樂陪伴來看花的人，予逐家心情加較輕鬆。
雲林縣愛無礙協會看顧身軀較有欠缺的，逐年攏會挑一个所在tshuǎ逐家出來行踏，今年來到四湖鄉的孤挺花園表演，協會表示有的會員因為接觸音樂，久來，慢慢仔敨放心內的結，原本憂鬱的情形，改善袂少。
雲林縣愛無礙協會的會員，雖然有的身軀較方便，不過，逐家佮意和人分享的心，並無受著限制，眾人就攏期待這一年一擺出去Tshit thô、和人交流的機會，望用音樂，增加生活的色彩，也帶給予人閣較濟快樂。
記者 綜合報導
