臺灣總統民選30年 辦「1996序曲」音樂會紀念

李前總統登輝先生追思影片:「逐家啊，拜託拜託啦。臺灣啊，欲交予恁喔。」
 

李登輝是1996年臺灣民選的頭一个總統，咧臺海飛彈危機當中，臺灣和平轉向直接民主，李登輝去予外國媒體叫做「民主先生」。今年是臺灣總統民選滿30年，咧李登輝過身以後，逐年李登輝基金會攏會辦音樂會，今年特別邀請捌佇「國際橋牌社」演過李登輝的藝人楊烈做領銜歌手。
 

唱歌:「飛咧闊莽莽的天，陣陣仔吹。」

這條「千風之歌」，是前總統李登輝在生的時真佮意的一首歌，伊的查某囝李安妮講，李登輝就是希望會當永遠佮逐家鬥陣。音樂會領銜歌手楊烈嘛分享講，過去咧演李登輝的時，上重要的精神就是愛共民主囥咧心肝底，這回音樂會嘛會共關心臺灣人的心、用歌聲表達。

《1996序曲》領銜歌手楊烈:「伊到這馬我咧想，伊猶閣有彼號心情咧關心全臺灣的人，彼款的心情對我家己的聲音內面共透露出來。」

今年的音樂會號做「1996序曲」，總共選15條會當代表臺灣的經典樂曲，包括「黃昏的故鄉」、「母親的名叫臺灣」等等。基金會表示，毋但是欲予民眾會記得這30年來臺灣的民主化有偌無簡單，嘛希望咧未來臺灣人會當對悲傷行向幸福快樂。

李登輝基金會董事長李安妮:「咱咧講臺灣歷史的時，咱攏是足悲哀，予人殖民、予人迫害啦等等，但是家己做主人了後，咱愛家己創造咱家己的幸福。」

音樂會拍算8月23辦佇國家音樂廳，李安妮希望會當予少年朋友理解民主的珍貴，嘛欲邀請民眾入座感受自由的重量，然後繼續寫咱未來的樂章。(新聞標題、導言及內文皆為台語文)