交通新制 滿70歲交回駕照.會當用TPASS補助

往過考oo-tóo-bái駕照的筆試，是非題較簡單，干焦選著抑是毋著，但是對1月底開始，就無遐簡單矣，考機車駕照的筆試、全面改選擇題，考50題，交通部強調，改變做法是為著欲降低交通違規和事故，民眾也真支持，因為佇車路常在看著交通違規，攏會懷疑有人的駕照敢是用雞腿換的。

民眾
無拍方向燈，有時陣烏白停車擋著出入較麻煩

公路局局長 林福山
以後袂有是非題全部是選擇題，內底情境題和危險感知，愛看影片的部份，本來是10題嘛會提懸到15題

交通部另外一項新措施，是對元旦開始，鼓勵70歲以上的老大人將駕照交轉去予政府，改坐車閣有補助金通領，針對這个政策，民眾也真支持。

民眾
違規踅頭佮烏白換車道，序大確實較捷出現這種狀況，這个想法(鼓勵序大坐車)袂bái

民眾
(新措施)真好，老大人毋免駛車 危險，反應傷慢 真捷出車禍

交通部表示，oo-tóo-bái筆試新制題庫總共有1050題，有欲準備考試的民眾會當佇公路局監理服務網站先了了解題型做練習，啊若主動將駕照交轉來的老大人，會的有交通補助2年，每個月上濟補助1500箍，逐家共同來建立安全用路環境。

記者 陳心彤 王志剛 臺北報導