隨機刣人新聞放送 NCC:犯案影像無剪接會罰

頂禮拜五咧捷運臺北車站、中山站外口發生的隨機刣人案件，逐工無論是新聞抑是網路，攏猶有真濟討論。有民眾反應講親像新聞直直播兇手犯案的畫面佮手路，會增加社會不安抑是有樣看樣，認為新聞應當加宣導防衛意識。

民眾
宣導講莫那行那掰手機仔這款的就是愛加一份猛醒的心莫攏認為若像攏真安全按呢就無去注意四周環境

民眾
媒體嘛是致使犯罪出現的主要原因因為真濟人攏想欲去模仿會造成驚惶閣來就是其實嘛會煩惱親人朋友坐捷運敢會拄著這款危機出現

電視受著「衛星廣播電視法」和「電視分級處理辦法」的規範，NCC指出，新聞應當避免過度呈現使人驚惶的畫面，牽涉暴力攻擊、殘酷等等的畫面嘛袂當特寫、著經過剪接處理，袂使過度使用悲傷者痛苦的影像，報導比例著斟酌，避免二度傷害針對臺北隨機刣人的電視新聞，NCC講已經有收著6件申訴，嘛呼籲媒體自律，會調新聞畫面出來看是毋是牽涉違法，紲來也會送到諮詢會議，才來做決議。

NCC電台與內容事務處專門委員 陳金霜
可能著注意講莫有一寡可能會對猶未滿6歲的囡仔發生不良影響的暴力 殘酷 恐怖這寡情形衛星廣播電視法伊是規範咧第28條若是違反來講彼个處罰對警告20萬到200萬按呢
 

針對網路的部份，台灣司法精神醫學會也有專家指出，民眾過度討論加害者和傳播，嘛會致使模仿犯增加，所以民眾嘛著自律，政府也應當強化網路巡檢和通報介入的機制。

記者 呂尚儒 謝季潾 臺北報導