工人無做安全防護 連人掛豬哥機摔落樓死亡

畫面內底白色的貨車拄駛出來，後壁路底的斡角雄雄有物件對樓頂摔落來，乓一聲，予附近的民眾攏走出來看。民眾講，對面的海霸王高雄分公司，早起用吊車欲吊堆高仔起去四樓，堆高機廠商的員工佇樓頂等欲駛堆高仔，in聽著聲走出來看的時陣，人佮堆高仔已經摔佇咧塗跤。

附近食品廠員工：「因為伊就是佇遐等，人堆高機吊到頂頭，伊欲對頂懸遐（四樓）開入去，伊就落落來矣，敢有固定好勢這我就無清楚。」

現看著的民眾：「板台，堆高仔開行板台就敧落矣，掛人嘛（摔）落來。伊遐板台你著愛予伊架咧塗跤，架予好勢才開；你架無好勢，你半空中開，你這馬開出去就重頭輕矣。」

勞工局表示，摔落來的是業者倩的外包廠商員工，今年35歲姓蘇，去堆高機公司上班才兩年，送病院急救猶是不幸過往，海霸王舊年起新大樓嘛捌因為吊掛作業無合規定予罰錢，勞工局強調，欲用板台吊堆高仔起去樓頂，一定愛做好固定佮防止落落來的安全措施，這擺廠商毋但無做，姓蘇的員工嘛無戴安全帽、綁安全帶，已經違反職安法，除了罰錢閣會追究刑事責任。

高雄市勞工局副局長 皮忠謀：「勞檢處已經下令現場停工，雇主牽涉著違反職安法第6條第1項的規定，會處上懸新臺票30萬的罰鍰，嘛會移送檢察機關，追究雇主的刑事責任。」

勞工局表示，吊車廠商佮堆高機廠商的安全維護攏無做好勢，兩間攏會罰，另外工務局講，廠商欲做吊掛作業無申請路權，這部份，警察機關也會當照道交法，上懸罰兩千四。

記者 許嘉茹 邱紹揚 高雄報導