艋舺一間幼稚園傳出苦毒兒童的事件，受害的囡仔達到20位，而且園方若像閣共家長威脅，若欲調監視器，囡仔就會予怹退學。4位受害家長拜二（8/26）開記者會，點名臺北市教育局咧掩護幼稚園，毋但予怹繼續營業，甚至予涉案老師繼續佇佮幼稚園有關係的補習班做老師。（新聞標題、導言及內文皆為台語文）
疑似受害家長 李小姐：「半暝仔閣會做惡夢講『老師莫共我拍，媽媽』，阮做老爸老母的心真正非常疼。」
家長想著家己的囡仔，佇幼稚園受著傷害，哭甲真大聲。對監視器畫面會當看著，囡仔去予老師搧喙䫌，發生代誌的是台北萬華的一間幼稚園，今年三月初，有家長發現囡仔身軀頂有濟位烏青，囡仔投講老師會共伊拍，受著苦毒的囡仔有20幾位。3月中家長要求學校提供監視器畫面，結果隨予學校威脅，若欲看監視器畫面著愛退學。
疑似受害家長 周先生：「阮共這件代誌共教育局講，教育局講無法律通管，干焦會當予阮尋求消保官的方式，去行消費爭議的這塊。」
代誌發生了後，臺北市教育局回應講，已經有調查幼稚園攏總40个上課日、差不多320點鐘的監視器畫面，針對違法的部份全案累積裁罰97萬3500箍，嚴格處份。
臺北市政府教育局主任秘書 鍾德馨：「第一時間保存工課記錄器、影像等證據，並且以上緊的方式完成調查，認定李姓教保員，不當對待幼稚園行為是事實。」
但是今年四月閣予家長發現，事後幼稚園閣共監視器拆掉，這个苦毒囡仔的老師，離開幼稚園了後，閣去in幼稚園樓頂開的安親班做老師，家長就驚囡仔的安全無法度受著保障。教育部回應講會閣請臺北市進一步處理。
教育部國民及學前教育署學前組科長 陳鉉淑：「關於臺北市這个案件，阮會先了解講，臺北市到底有佗一个部份是猶未做調查處理的，包括彼个監視器畫面的部份，遐的物件是猶未做裁處；另外就是對已經予教育局管制的人員，是按怎閣入去幼兒園來做來做一个教保服務的工課，這層代誌嘛著愛請臺北市做一个處理。」
教育部表示未來會繼續調查，也要求臺北市政府積極保障兒童的安全，莫予囡仔佇無安全的環境大漢。
記者 鄭亞宣 林郁凱 臺北報導