歌仔戲的傳承和培養觀眾，攏是真重要的文化工程，臺灣戲曲學院趁歇熱，舉辦兒童歌仔戲營，予校內歌仔戲學系的學生來做營隊的講師，教國小的囡仔學歌仔戲，了解戲曲的歷史。就有囡仔分享講，本底是無了解歌仔戲，猶毋過上課以後，予伊真有興趣，未來會想欲主動去看歌仔戲。（新聞標題、導言及內文皆為台語文）
「共兩枝指頭仔合倚，這叫做劍指。」
講師示範歌仔戲的跤步手路，囡仔嘛綴咧比手畫刀。臺灣戲曲學院趁歇熱舉辦兒童歌仔戲營，欲予國小的學生體驗歌仔戲。有家長講，希望透過參加活動予囡仔認捌歌仔戲、嘛學講台語。囡仔嘛講，參加營隊以後，未來會想欲去看戲，甚至學歌仔戲。
家長 林小姐：「因為阮兜罕得講台語，所以我希望，會使予囡仔加接觸台語的戲曲。」
營隊學員 張宇超：「因為表演我嘛想欲去看歌仔戲，嘛想欲去學歌仔戲。」
除了搬演楊宗保和穆桂英的故事，予台跤的學生囡仔看甲仁仁仁，臺灣戲曲學院歌仔戲學系的學生來做營隊的講師，教遮的國小學生了解臺灣歌仔戲的歷史、唱唸和跤步手路，用怹的專業來傳承文化。
營隊講師 楊佳倫：「借著這改的機會，會當予怹對歌仔戲上無有一寡寡仔了解，看著知影講這是歌仔戲，按呢其實我就真歡喜矣。」
新世代講師擔起傳承歌仔戲的責任，怹認為透過活動，會當予閣較濟囡仔來接觸歌仔戲，按呢傳統戲曲未來才有機會佇囡仔生活中釘根生湠。
記者 魏宗仁 莊浚佑 臺北報導