風颱薇帕咧欲形成 氣象署：袂直接影響臺灣
加入公視會員，
按讚收藏你關注的報導
發布時間：
更新時間：
菲律賓東方的熱帶性低氣壓，預估佇未來2工就會變做今年的第6號風颱「薇帕」。氣象署判斷，這粒風颱袂對臺灣造成直接的影響，毋過拜五（7/18）到禮拜（20），外圍環流會予臺灣各地頭攏落雨，東部和恆春地區可能會落誠大，提醒民眾愛注意天氣的變化。（新聞標題、導言及內文皆為台語文）
熱人是風颱的季節，菲律賓東爿的海面已經有出現熱帶性低氣壓，氣象署預估閣一、兩工就會變做輕度風颱，嘛是今年的第六號風颱薇帕。氣象署表示，若準變做風颱，預估拜五到禮拜會上倚臺灣，有可能會發佈海上警報，猶毋過袂直接對臺灣入來。
氣象署預報員 張承傳：「未來的路線和早起的判斷仝款，猶是會照西北偏西的方向，先經過呂宋島的北爿，閣經過南海一直到中國廣東。」
臺灣因為吹西南風閣轉東風，拜四臺灣各地是濟雲到好天或者是落西北雨，南部地區和各地山區愛注意過晝有較大的雨勢。拜五到禮拜受著熱帶系統的影響上大，拜五東部雨勢會沓沓仔變大，西半部地區以西北雨為主，拜六、禮拜，南部會落陣雨，中部和北部落西北雨，抑若東部和恆春地區可能會摔大水雨，提醒民眾出門愛注意。
氣象署預報員 張承傳：「拜六佮禮拜這兩工，除了東半部會繼續落雨，佇南部地區嘛有無定時的陣雨和雷公雨。目前看起來，中部以北的天氣猶是濟雲到好天，猶閣有西北雨的天氣為主。」
氣象署嘛表示，拜四北部會較熱，彰化部份地區嘛會出現36度的懸溫，民眾若是出門愛會記得補充水份。氣象署講後禮拜一準風颱雖然會對中國去，毋過後禮拜一到拜三臺灣受著低壓帶的影響，全臺灣天氣無穩定，民眾著愛注意天氣的變化。
記者 魏宗仁 莊浚佑 臺北報導
唐嘉良/編輯
