護理跤手無夠致使關床？ 臺南衛生局啟動稽查
發布時間：
更新時間：
臺南的大病院無病床，有議員講，有化療的病友等無病床，甚至傳出患者等傷久等甲過身，質疑敢是護理人力無夠，造成關病床。衛生局表示，病床數量有隨時調整，已經啟動稽查，掌握病床數量，嘛呼籲民眾落實分級醫療。（新聞標題、導言及內文皆為台語文）
急診室外口濟濟人咧等病床，像按呢的情形，佇臺南逐間大病院加減攏有。近來臺南濟濟市議員接著民眾陳情，講有人化療等三禮拜猶等無病床；嘛有人病情惡化送去急診無法度隨處理，甚至有人等傷久過身。議員質疑，敢是護理人力無夠才關床？成大病院回應，是配合病房整修才暫時關床；若奇美病院目前並無關床。
臺南市議員 林燕祝：「民眾來共阮陳情講毋是按呢，怹根本無護士。咱尾仔去了解，是全國的護理師真正是無夠，若講無關病床，病院的量攏無夠。」
成大病院醫務秘書 林志豪：「本院會堅守醫學中心的社會責任，急重症服務量能袂拍折；輕症佮普通時仔的檢查，阮已經有合作病院建立分流機制。」
奇美病院醫務秘書 陳奇祥：「包括對SARS、0206大地動，其實阮對人力參床位的調度，攏無足大的問題。」
根據衛生局初一統計，各大病院的急性一般病床，其中成大、奇美病院的使用率攏超過九成，衛生局強調，到今猶無接著病院申報病床異動。日前是流感嚴重，加上各科病床用途無仝，才致使出現等無病床。若護理人員無夠，確實嘛是關床的因素。根據臺南護專調查，學生畢業三年內有九成投入醫護界，毋過校長認為，職場通愛閣較友善。
臺南市衛生局副局長 林碧芬：「衛生局為著積極掌握、管理區域內醫療資源使用情形，已經主動去病床占床率偏低的病院訪查，了解病床運用狀況，市民嘛會使透過各大病院官網查詢。」
國立臺南護理專科學校校長 黃美智：「無論是薪水、人員培育、各項福利，會當予職場的人，未來阮學生出去會使有好的福利。」
衛生局講，有要求各病院，若有關病床，愛佇30工內申報。衛生局呼籲鄉親，若破病，會當先去診所，若有必要，才閣由電子轉診平台轉去大病院，通減少等待的時間。
記者 李晨宇 臺南採訪報導
唐嘉良/編輯
823公投》重啟核三，你怎麼看？
