母親節欲到 今年剪絨仔花袂赴開花、價數懸

原本應該會當收成的剪絨仔花，這陣攏猶是花莓爾，干焦少數有開花。彰化田尾是臺灣剪絨仔花上大的產地，但是今年三月溫度低，影響開花的時間，花農表示，今年的花期差欲規個月，有4成左右的花袂赴佇母親節進前開花。

花農王順利講：「今年寒較濟啦，寒傷久去矣，拖差不多一個月的產期去矣。猶無以前是到母親節，咱差不多剪8、9成去矣，今年攏賰差不多6成左右。」

農民表示，舊年七月剪絨仔花的母欉，就因為風颱影響、無健欉，今年初的低溫閣影響開花的時間，目前干焦有6成左右的花通收，價數嘛綴咧起，舊年1支賣10箍、今年愛15箍才買有，愈倚母親節價數可能會愈懸。

民眾蕭小姐講：「嘛是會想欲買，買予媽媽按呢，就是一種儀式感。」民眾陳小姐講：「媽媽上重要，花嘛足媠的，所以講一年買一改剪絨仔花予媽媽嘛是足好的，予伊歡喜。」

彰化縣田尾鄉農會總幹事吳政憲講：「新曆的七月到隔年的五月攏猶閣有花啦，平常時咱嘛會使妝娗厝內，有生活藝術、生活美學。」

田尾鄉農會表示，除了配合節日送花，這幾年in嘛咧推捒，會當用剪絨仔花來妝娗厝內，今年閣佇大甲媽繞境時陣送剪絨仔花，宣傳國產花，希望開發無仝的用途佮銷路，增加農民的收入。