辦案掠毋著人！ 民眾無辜予警察tshuā轉去派出所
加入公視會員，
按讚收藏你關注的報導
發布時間：
更新時間：
高雄昨昏（4/17）有一位姓林的查某人，去予掠通緝犯的警察當做是仝黨的，警察態度強硬閣歹聲嗽，愛伊報身份證號碼，最後是硬共人tshuā轉去派出所。落尾警方發現掠毋著人，才放伊走。事後當事人共過程攏囥佇網路，引起議論。今仔日（18）鳳山分局出面會失禮，承認錯誤，嘛會追究三位員警的責任，進行懲處。（新聞標題、導言及內文皆為台語文）
林女 vs. 高雄市忠孝派出所 員警：「我無愛叫車。（啊你毋是欲轉去？）我欲行路去警察局，看恁是毋是真正是警察。」
三个查埔人自稱是警察，但因為無穿制服，姓林的女子毋願意綴怹走。17暗時鳳山忠孝派出所的員警佇文化中心欲掠逃走的通緝犯，警方認為女子是仝黨的，共人閘落來查問，當事人講伊是行路來還冊，因為警察態度強硬，聲嗽真歹，女子嘛無愛報身份證號碼，最後人予tshuā轉去派出所，一直到暗時10點外，警方總算查清楚認毋對人矣，才放人離開。當事人佇網路貼文批評警察烏白掠人。事後鳳山分局出面會失禮，嘛承認警察的作法無適當。
高雄市鳳山分局副分局長 蔡富原：「針對著這案的違失，警方除了向當事人表達上深的失禮以外，另外會照規定懲處佮追究考監責任，同時加強員警的教育訓練。」
民眾無犯罪去拄著警察執法無適當，親像這款情形，欲按怎維護自身的權益咧？律師講，民眾現場會當先要求警方提供異議單，將盤查的過程、警察的資料攏記錄落來，做日後行政訴訟的憑據，若是予逮捕，會當要求提審，由法官來介入審查。
律師 洪紹倫：「人民只要予法院以外的任何機關逮捕拘禁，無論是毋是有根據犯罪嫌疑，伊本人抑是其他的人攏會當申請提審，由法官介入審查剝奪人身自由的合法性。異議單的作用是，若是民眾認為警察的盤查無理由，會當當場提出異議，要求警察重新審視家己盤查的理由。」
佇這擺的事件，警察攏無共民眾講伊的權益，予當事人扣留佇分局將近兩點鐘，律師強調，分局是公共空間，假使民眾有受著言語的打壓抑是霸凌，嘛會當向法院提出公然侮辱的告訴。
記者 許嘉茹 邱紹揚 高雄報導
唐嘉良/編輯
