拜六佇中正紀念堂頭前，有大批民間團體集合，號召大約500个民眾，訴求愛共中正紀念堂關起來，而且趕緊做園區的轉型，也清除臺灣各地的威權象徵，落實臺灣的轉型正義工程。（這則新聞標題、前言、內文為臺語文。）
民眾喝口號：「臺灣無需要獨裁者紀念堂，真的。」
中正紀念堂的大門關咧，大批民眾咧頭前攑布條、喝口號。今年是蔣介石過身第50年，濟濟民間團體拜六，佇中正紀念堂頭前集合，訴求趕緊共中正紀念堂關起來。現場有已經96歲的政治受難者出席，呼籲透過關中正紀念堂，還原歷史真相。
政治受難者前輩張則周：「就是希望共過去歷史的事實展現出來，所以今仔日這个運動，毋但是咧轉型正義的教育，是非常重要的一頁，而且咱按呢做了後，才通予一寡無辜受害的臺灣同胞、在天之靈、閣有𪜶的家屬，得著一寡安慰。」
民間團體呼籲政府，為著落實轉型正義，應該先共中正紀念堂關起來，進行整體園區的轉型，才閣擴大到消除全臺灣的威權象徵。
519行動組合召集人王美琇：「一方面你咧歌頌臺灣的民主自由，但是另外一方面，你閣佇首都的市中心，咧服侍一个獨裁者，全世界的觀光客來到遮，你是欲共這所有世界的觀光客，你是欲傳達啥物款的價值信念。」
民間團體指出，臺灣猶有真濟威權象徵，親像銅像、路名中正路、銀票頂的蔣介石圖樣等等，攏需要改變。𪜶強調，歷史記憶傳承、轉型正義工程、閣有民主，是三个相關連的議題，需要做陣推捒，才通予歷史莫閣再發生。