《來去恁兜洗魂舒》 走遍臺灣洗身軀、交朋友
發布時間：
更新時間：
旅遊實境節目真受觀眾佮意，公視台語台有推出一个新節目，號做《來去恁兜洗魂舒》。是兩位主持人家己紮浴桶，佇臺灣各地交朋友、過暝、洗身軀（hun-su）。節目中會當感受著臺灣的人情味佮臺灣人的善良。（新聞標題、導言及內文皆為臺語文）
[ 涉己新聞 ]
佇南投埔里，那洗hun-su、那食時計果，浸佇跤桶，規身驅放輕鬆，享受庄跤的風景，這是資深的藝人邰智源離開電視主持10年後，閣轉來電視頂的新節目。
主持人 邰智源 vs. 主持人 邵大倫：「我開車，後斗紮兩个浴桶，彼个浴桶是我和大倫兩个人去做的。」
「阿倫老師你好！」
「你好，你好。」
「今仔日伊是咱兩个的老師。」
透早無閒到透暗，兩位主持人去到農場鬥作穡，這是公視台語台新的旅遊實境節目《來去恁兜洗魂舒》，主持人駛車，去台灣四界走透透、那交朋友，那發覺台灣這片土地的故事。
主持人 邰智源 vs. 主持人 邵大倫：「其實上主要的是洗身軀以外，愛去看這个地方的風土人情。佮這家伙仔食飯，知影講伊平常時做啥物工課。」
佮一般實境節目無仝，因為有過暝，所以真正愛洗hun-su。洗hun-su就是洗身軀sin-khu，會讀做洗hun-su是因為這是宜蘭腔。
主持人 邰智源：「這是宜蘭的一个特殊的腔口，叫做洗身軀（hun-su）。比如講咱講枝仔冰，怹叫霜仔。」
主持人表示，這是一个深度旅遊、深入台灣每一角勢的台語旅遊實境節目，節目內底有台灣的人情味佮台灣人的善良，身軀洗好，靈魂嘛有爽快的感覺，新節目會佇逐禮拜六暗時放送。
記者 鄭亞宣 許猛捷 臺北報導
唐嘉良/編輯
