臺南擴大公寓公安申報規範 老社區實施恐驚食力
發布時間：
更新時間：
頂個（1）月，嘉義發生規模6.4的地動，造成臺南各地頭有大樓受損。臺南市政府公告，對今年開始擴大規範，六層樓至七層樓的集合式公寓大樓，每四年愛做一擺建築物的公共安全檢查申報。毋過有人煩惱，無管委會的老社區，恐驚無人來處理。（新聞標題、導言及內文皆為臺語文）
工程人員提鷹架咧加強來亞大樓的結構，這棟大樓老舊閣拋荒十外冬，1月30受著地動影響，外牆thài-lù落落來，撼著停踮下跤的兩台轎車，玉井嘛有大樓受損。針對大樓臺南市政府宣佈今年欲擴大公安申報的範圍，6至7層樓的集合公寓大樓，嘛愛每4冬申報1擺。毋過根據統計，全臺南有246棟大樓到今猶無管委會。有議員講，無管委會的社區，申報會有問題。
臺南市議員 沈震東：「未來若講無管委會，按呢所有權人集合起來，我感覺其實是無法度執行的。所以佇這个狀況之下，我想工務局愛鼓勵逐家成立管委會，予管委會來知影這个狀況，然後共老舊的公寓維護閣較好。」
袂少大樓攏真支持政府加強檢視建築物公共安全，特別是最近地動定咧發生，毋過嘛是有人反映設管委會顛倒增加管理費。臺南市工務局講，內政部原底的規定，八層以上到十六層的建築物每三年申報一擺。若臺南的新制增加六樓至七樓的，公安申報作業檢查項目包含安全梯、避難層出入口等項目。
大樓住戶：「有管委會當然管理上會較周至，但是這馬有一个問題，就是經費上的問題。因為阮管委會收的費用嘛是真正足懸；工安的部份政府單位可能愛閣思考，欲按怎去運作。」
臺南市工務局副局長 王建雄：「民國93年一月初一以後領著使用執照者，愛佇新年第一季完成申報；佇92年12月31進前領著的，愛佇明年第一季完成申報。」
工務局指出，若猶未成立管理委員會的公寓，會先輔導怹成立管理組織，嘛講起頭會先宣導，未來若無照規定完成申報，會以建築法處罰六萬到三十萬。
記者 李晨宇 臺南報導
唐嘉良/編輯
