維護天篷公園治安 三民區3派出所共同管理
發布時間：
更新時間：
高雄車頭的天篷，舊（2024）年底啟用了後，隨變做民眾tshit-thô、頓卡的熱門景點。天篷的治安管理，目前除了有保全巡邏，天篷治安維護是由附近三个派出所做伙負責。（新聞標題、導言及內文皆為臺語文）
高雄火車頭天篷啟用了後，天篷頂四序的跤踏車道、豐富的植物景觀，加上誠有特色的設計，真濟市民、遊客攏會來遮運動、tshit-thô。毋過遮爾曠闊的區域，除了高雄車站有派保全巡邏，其實天篷的管理單位是屬於高雄市公園處，治安部份按算是交由警察局三民一分局來負責。
遊客：「有、有、有，有看著大概仔三四位，穿䘥仔，就是䘥仔頂面會寫保全。」
其實因為規个天篷的範圍真闊，是交由鄰近長明、十全佮哈爾濱三个派出所做伙來管理，這嘛予民眾煩惱，怹若是毋知影位置，到時欲報案是欲揣啥人處理。有人建議愛有標示。三民一分局是講，民眾只要講出報案的位置，勤務中心攏會當處理。
三民一分局副分局長 鍾睿賢：「若伊是講，我人佇圓箍仔的空中花園，阮就會派長明所過去；毋過伊，若是伊毋知東爿抑是西爿，阮嘛有請勤務指揮中心，接著這款報案的時，連鞭就派十全所佮哈爾濱所的員警，仝時間起去看。」
民眾：「你上簡單的應該是用幾號座標，按呢員警欲來處理嘛知，是毋是？咱假使遮是220，啊去是221按呢。」
三民一分局表示，規个車頭工程攏完工了後，原本干焦34位員警的長明派出所，今年也會增加到38人，予警力有適當的調配。
記者 許嘉茹 邱紹揚 高雄報導
唐嘉良/編輯
