國家文藝獎得主 本土詩人李魁賢享壽87歲
發布時間：
更新時間：
臺灣詩人李魁賢佇1月15過身，食到87歲。講著李魁賢，伊毋但對臺灣本土文學有真大的貢獻，伊也是翻譯家、工程師。在生的時，伊積極佮國際詩壇交流，提過國內外真濟項文學獎，包括國家文藝獎、韓國的亞洲詩人貢獻獎，會當講是臺灣文學界重要的先輩。（新聞標題、導言及內文皆為臺語文）
已別世詩人 李魁賢：「對黃昏的雲彩，看著你的媠。臺灣，我的家鄉，我的愛。」
詩人李魁賢用母語念出〈我的臺灣我的希望〉這首詩，伊佇1月15過身，食到87歲。伊自16歲就開始寫詩，也佇1964年加入笠詩社，作品反映臺灣社會佮土地。除了創作，伊也捌翻譯濟濟外國文學，積極參與國際詩壇，促進臺灣和世界的交流。
國北教大台文所教授 翁聖峰：「有頭前，才有後壁的果。我是按呢來看。所以我足感謝李魁賢老師，進前佇咱臺灣的拍拚佮國際的交流。無論是伊出去（國外），抑是辦國際詩人節，這攏有足大的貢獻。」
臺灣文學館也表示，目前館內的一寡典藏、手稿、國際詩人批信交流紀錄，攏是李魁賢老師在生的時陣無私提供，這寡珍貴的物件，攏是臺灣文學重要的根。
國立臺灣文學館副館長 蔡明諺：「伊個人的詩作創作，本身就是倚近土地、倚近現實。伊特別強調一般人民的生活經驗，伊本身做工程師，其實攏有關係。就是講伊的詩作，就會較偏向理性、冷靜、客觀；伊的表達就會較束結。」
臺灣文學館表示，詩人李魁賢一世人得著濟濟獎項，包括國家文藝獎、韓國亞洲詩人貢獻獎等等，伊毋但是詩人也是發明家，所以過去也捌提著美國愛因斯坦國際學術基金會和平銅牌獎。文化部表示，詩人李魁賢透過文學tshuā臺灣行向世界，文化部會呈請總統明令褒揚。
記者 張佳倪 謝季潾 臺北報導
唐嘉良/編輯
