臺中保安宮修復60年舊底片 看早期進香情景
發布時間：
更新時間：
臺中北區的保安宮，5冬前咧整理的時，發現3支電影底片，記錄60年前保安宮去臺南進香的畫面──有鬧熱的陣頭佮往過臺中的街路景色。廟方也按算佇後個（1）月初4公開放送，邀請民眾做伙來看珍貴的歷史影像。（新聞標題、導言及內文皆為臺語文）
烏白的電影紀錄片，翕的是60年前台中保安宮去南鯤鯓進香畫面，濟濟參與割香的民眾、鬧熱的陣頭，閣有過去街仔路的景色，早前的畫面重新播送，民眾坐佇廟埕頭前金金看，逐家攏真數念。
民眾 王碧珠：「看著彼个景色嘛誠懷念，較早有三輪車，彼是阮囡仔時代才有咧坐的，這馬攏無地看。」
民眾 黃欽洲：「較早的穿插真整齊啦、誠正式啦，嘛有穿旗袍的。」
台中北區的保安宮，主要服侍五府千歲，對1950年開始，逐年攏會去南鯤鯓代天府佮麻豆代天府進香割火，廟方五年前整理廟寺的時，意外發現三支電影底片，是過往的知名電影工作者，何錂明導演所翕的進香影片，影片呈現60年前保安宮去台南進香的珍貴畫面。
台中保安宮常務委員 呂宗倫：「這馬這个時代已經無法度播送（底片電影），所以拄好揣著張凌文（臺灣電影收藏家）大哥，用古董的機器來放影片按呢。」
臺灣電影收藏家 張凌文：「（底片）剪接攏有一个結頭，囥六十年的時陣攏烌去矣，所以每一个剪接過的所在，我攏重剪，放的時陣才會當誠順利。」
台中文史復興組合創辦人 格魯克：「有翕著台中市足濟的地點，親像台中路的火車路空，代表怹欲出去南部的時陣會經過這个所在。這馬較發展的關係足濟厝攏無留落來，所以咱對遮的影片，會使看著台中市以早留落來的物件。」
廟方表示，這遍揣著的紀錄影片，呈現1960年代台中的景觀佮民間信仰的活動，除了進行數位典藏，也會佇下個月初四佇保安宮舉辦播送活動，希望予閣較濟人看著早前的歷史影像。
記者 楊舒晴 台中報導
唐嘉良/編輯
