民團籲增加有薪水的親職假 請假愛有通伸勼

立法院社會福利佮衛生環境委員會舉辦公聽會，主要是討論敢欲佇現有的育嬰留停制度當中，增加有薪水的親職假，閣有這請假的時間敢會當有較大的伸勼。現場有專家認為，請假時間應該愛較自由的，予爸母會當以點鐘、天數來請。

佇非假日的時間，會當tshuā囡仔出門tshit-thô，爸母毋是愛特別排假、無就是家己開店做生理的，才會當自由tshuā囡仔出門tshit-thô。有家長表示：「當然是希望會當去配合囡仔，但是有當時仔是公司頂面敢會當配合，就無一定。」嘛有開店家長表示：「逐家攏雙薪家庭，阮若家己開店就真正較自由，囡仔若真正臨時破病，會當有後援。」

為著爭取予爸母有伸勼的工時通陪伴囡仔，立法院衛環委員會拜三（11/13）舉辦公聽會，討論是毋是欲佇現在的育嬰留停制度中，增加有薪水的伸勼親職假。民間團體表示，現在的育嬰假是規定一改攏愛請30工以上，佇囡仔3歲進前，上長會當請兩年。民間團體希望政府修法，增加有薪水的伸勼親職假予爸母通自由運用，會使以點鐘、天數來請假，而且會當使用到囡仔8歲。

托育及就業政策催生聯盟發言人——黃喬鈴表示：「唯一會當明確用來支持家長的干焦育嬰假，煞干焦會當以月做單位，而且干焦會當用到囡仔滿三歲，有家長就講，阮囝腸仔病毒，隔工傳染予大的，兩个囡仔差不多停課半個月，我干焦會當強扒躡用掉特休才請事假，尾仔出現規氣辭職的念頭。」

毋過，嘛有律師認為，育嬰留停頭家免付予員工薪水，毋過若增加有薪水的伸勼親職假，頭家就愛增加人事成本 ，而且目前就有家庭照假通用。

國家政策研究基金會召集人——簡榮宗表示：「留職停薪的重點是停薪，但是佮這馬有薪水的親職假敢是有衝突，若咱這馬咱閣加出一个有薪水伸勼親職假，敢會社會上可能嘛是舞袂清楚佮這馬的家庭照顧假有啥物無仝。」

少子化已經是國家危機，為著提懸少年翁仔某生囝的意願，國家這幾冬有推動真濟福利。現場嘛有專家建議，欲修法的進前，應該愛先確認親職假背後的理念，才會當顧慮著員工、頭家的立場，推出一个逐家攏滿意的制度。