李江却轉型正義講座 對民間信仰看威權歷史

為著欲了解臺灣過去的威權體制，不當黨產委員會委託李江却台語文教基金會、辦轉型正義系列講座，透過文史佮民間信仰，來看政治壓迫對臺灣社會的影響，予民眾思考、按怎落實轉型正義。


對平海大將軍-王勳的信仰開始講起，1754年出世佇台中沙鹿的王勳、因為保衛鄉里，閣參與林爽文民變事件，佇地方留下英勇的形象，後來受百姓敬拜；黨產會委託李江却台語文教基金會，辦理轉型正義講座，用民間信仰來看臺灣發生的歷史事件

講者溫宗翰表示，「嘛毋是講干焦佇清朝，抑是日本時代有遮的信仰文化，咱佇咧戰後國民政府來臺灣了後，譬如講佇228事件的時陣，咱就有一寡犧牲者，遮的犧牲者有的人 有予人祭祀，伊就變成是在地的神明。」

親像佇雲林虎尾的三姓公廟，拜的就是三位二二八事件的受難者，閣有林才壽前輩，在厝內設紀念館，供奉所有佇二二八事件犧牲的臺灣義民，攏是歷史事件演變成做民間信仰的例

民眾講：「以不當黨產的角度切入宗教的議題，予阮這種平常人 閣較親近閣較了解。」
閣有民眾講：「進前毋捌知影講咱臺灣其實，有真濟廟咧拜的神，攏是較早歷史的人物。」

李江却台語文教基金會副執行長賴昭男表示，「基金會咧辦這个活動的時陣，是有共黨產會討論過，咱就是希望會當對無仝角度，去看轉型正義，予逐家會當對轉型正義有閣較深的了解。」

李江却台語文教基金會表示，過去也捌辦過以臺灣美術史、文學史為主題的講座，來討論黨國、威權時期，對社會的影響，希望予民眾了解，轉型正義除了講政治，其實嘛和咱生活的各方面攏有關係。