弄龍+燈光特技 「神龍派對」傳統陣頭新變化

音樂奏落，濟濟弄龍隊對台跤出現，對四面八方上台，閣有龍形的雞胿咧天頂飛，觀眾提手機仔出來翕，因為實在是真壯觀。這是國立傳統藝術中心的「2024鬥陣趣」陣頭藝術活動，配合今年龍年，傳藝中心邀請全台20組弄龍隊表演，打造一个「神龍派對」。

國立傳統藝術中心主任陳悅宜講：「有比賽著名的競技龍、有佇天頂飛的飛天巨龍、有輾仔鞋的弄龍，陣頭除了咱的民俗文化以外，咱閣通共陣頭元素按怎應用，按怎參當代對話，予逐家看著陣頭閣較媠，而且閣較感動人的所在。」

佇廟埕踏蹺、弄龍，今年的神龍派對閣箍10組弄龍隊佇士林區踩街，共士林神農宮、芝山巖惠濟宮、佮士林慈諴宮的主神攏請到傳藝中心，鬥陣來看戲。士林神農宮認為，這對文化傳承真有效果。

士林神農宮董事長何逸松講：「是真有水準(的表演)，而且閣袂造成困擾，袂造成講鞭炮放甲足濟的，我感覺講嘛有注重著環保，佮傳統的重點有結合做陣，予民眾對咱這傳統的技藝，佮傳統廟寺的感覺，有無仝款的感覺。」

神龍派對除了有傳統弄龍隊，閣有結合燈光、特技的弄龍表演，也透過市集予民眾熟似各款傳統文化，希望傳統文化有新的模樣，予少年民眾認捌，繼續予陣頭藝術代代傳。