用台語認捌文化 臺灣博物館推出台語導覽培訓

國家語言發展法施行了後，真濟博物館攏有推捒台語相關的活動。國立臺灣博物館，最近有規畫台語導覽員的培訓，希望未來就提供台語導覽，予民眾認捌臺灣的文化佮智識。

臺博館導覽員余陽輝予民眾紹介，「咱臺灣島就是佇歐洲亞洲大陸板塊，佮菲律賓海板塊，兩塊板塊互相相挨、相挵」


導覽員用臺語咧紹介台灣島按怎形成，這是國立台灣博物館的台語導覽員，in培訓的成果驗收，因應國家語言發展法，為著欲予民眾來到博物館，通聽著台語的導覽，台博館的導覽員參與台語培訓計畫，嘛著家己攢資料、加練習，導覽員講這是真有挑戰性的代誌。

臺博館導覽員余陽輝表示，「你講這兩禮拜，真正袂食袂睏，逐家攏足緊張，用華語講逐家削削叫，你若欲用全台語講，這實在是無簡單的代誌。」


導覽員也表示，用全台語紹介台博館內底各種有關台灣文化、生態的智識，愛做真濟功課，毋過用台語來了解這个島嶼的萬項代誌，伊感覺是認捌臺灣真重要的一部份。臺博館也強調，遮的導覽員需要經過臺博館的專業人員、閣有台語顧問的審核，才會當成做正式的台語導覽員。

國立臺灣博物館教育推廣組長黃星達講，「志工in的導覽攏會使有加一个台語的服務，按呢嘛代表講其實未來，阮毋是干焦語言面頂加一項爾，其實是代表講台語文化，入來阮的博物館內底，變做一个生活內底的一部份。」

台博館嘛表示，這馬會先佇本館推動台語導覽，未來逐禮拜會提供台語導覽的服務，紲落來in也會繼續規畫台語培訓，擴大栽培其他分館的台語導覽人才，予愈濟導覽員通用臺語、予民眾了解臺灣的文史智識。