旗津天后宮開基351冬 今提報升做國定古蹟

開基351冬的旗津天后宮，是高雄市頭一个服祀媽祖的廟宇，目前嘛是高雄市的市定古蹟。今年廟方決定欲申請天后宮升格成做國定古蹟，高雄市文化局證實，今年8月已經向文化部提報，文化資產局當咧做文化價值評估。

佇咧平常時仔，旗津天后宮猶原有袂少外國遊客來參觀拜拜，旗津天后宮自1673年開基到今351冬，雖然經過幾若擺修建，毋過無論是清朝的牌匾、百年王船、正殿柴做媽祖，猶閣有三通五瓜的木造結構，攏保存甲不止仔好，最近廟方正式申請天后宮列做國定古蹟，也佇議會引起討論。

文化局長王文翠表示：「旗津天后宮in遮爾積極想欲做國定古蹟，其實是真罕得的，因為一般私人的產業想欲做國定古蹟，攏是真驚惶才著，毋過in對家己廟的管理是真正有使命感，所以in家己希望會當成做國定古蹟。」

旗津天后宮主委陳冠銘則講：「咱做醮完備了後，咱天后宮管理委員會總數48位的委員一致認同來推廣，算予伊變成是全臺灣國家性一級的古蹟。」
 

2020年旗津天后宮上尾一擺整建，隔轉年入火安座，其實佇1985年時，內政部捌將遮列作國家三級古蹟，1997年文化資產保存法修正了後，天后宮就改列市定古蹟，四冬前主委陳冠銘就表示，想欲推捒天后宮升格作國定古蹟，彼當時閣邀請四位國寶級師傅參與修復工課。

文化局長王文翠表示：「文資局彼爿因為當咧委託做文化資產價值評估，彼按算年底會當完成，所以後續就會進入實質的程序內底。」文化局則表示，八月份已經正式向中央提案，審查程序恐驚愛半冬以上，民間也向望政府的協助，替高雄保留重要的文化資產。