雲門舞集轉嘉義 林懷民教22新港學生跳「薪傳」

新港文教基金會邀請雲門舞集的舞者，專工來指導、嘉義新港、安和國小佮月眉國小的學生，學習雲門舞集經典作品「薪傳」內面的「耕種與豐收」，希望透過舞蹈的方式，毋但展現農村的生活文化，嘛欲來提升新港的藝文教育。


雲門舞集的舞者，tshuā著國小的囡仔，做一寡簡單的動作，予IN學跳舞的時陣、跤手較放會開。新港文教基金會邀請雲門舞集，來指導22位學生，學習雲門舞集薪傳這个作品當中，一段經典的舞，種作佮豐收。

雲門舞集創辦人林懷民表示，「其實薪傳這个作品、種田這个舞，攏完全是因為這个，細漢佇新港的記持，這是這个作品誠重要的種子，所以今仔日會當轉來，予咱新港的囡仔來跳這个舞，我感覺足歡喜。」


安和國小是新港的小學校，目前干焦20外位學生爾。新港文教基金會表示，希望透過這改薪傳的訓練佮表演，毋但予人了解在地的農村文化，嘛予偏鄉的學生會當來增加自信。

參與學生莊棨恩：「佮林懷民老師跳伊編的舞，因為伊的作品的影片佮舞蹈，攏是伊家己編的，嘛攏無公開、所以我感覺，值得歡喜、嘛誠有意義。」
 

新港文教基金會董事長陳永華表示，「逐家攏一直關心這件代誌，我相信後擺會像懷民老師講的按呢，逐家攏會做伙來關心，新港這个藝文文化。」

學生家長黃小姐：「感覺足榮幸，因為林懷民會當來到阮安和遮，予咱的囡仔來學跳舞。」

22位學生佇雲門舞集資深舞者的指導之下，欲用3個月的時間、學習表演種作佮豐收這段舞。林懷民表示，學習的過程誠辛苦，希望在地的鄉親序大會當鼓勵佮支持遮的囡仔，做伙來參與新港的藝文教育佮發展。