治警事件展覽延到8/18 看臺灣人按怎追求自由

導覽員：「葉榮鐘是啥人我愛先介紹一下。葉榮鐘，林獻堂的秘書，然後就交代伊(葉榮鐘)趕緊去共別人講，然後葉榮鐘就騎鐵馬，到上近的一个車站，應該是追分車站，然後就趕緊衝到臺北去。」

透過導覽老師，說明日本政府逮捕濟濟臺灣議會請願人士以後，臺灣智識份子採取的行動。日本時代臺灣的智識份子，為著欲爭取地方自治，發起臺灣議會請願運動，佇1923年成立「臺灣議會期成同盟會」，煞予總督府以違反「治安警察法」掠起來。臺灣新文化運動紀念館規畫的「治警事件百年紀念展」，展覽以當時的報紙「臺灣民報」做基礎，tshuā民眾用記者的角度來看規个事件。

臺灣新文化運動紀念館館員，王力緯表示：「治警事件內底，伊就是逐字稿，逐字稿記錄譬如講，法官講啥、辯護士講啥、被告講啥，甚至講檢察官伊烏白講，伊攏寫落來。所以講咱會當根據遐的資料，會當整理出這擺展覽足濟物件。」

臺灣新文化運動紀念館指出，和當時日本人辦的報紙「臺灣日日新報」立場相對立，「臺灣民報」是日本時代1923年第一份臺灣人辦的報紙，徛佇臺灣人的立場為臺灣人發聲，勇敢批評時政、推廣文化、介紹新思想。臺灣文化協會嘛佇各地設立「讀報社」，讀報紙予民眾聽。

臺灣新文化運動紀念館館員，王力緯表示：「因為咱的捌字率無懸，所以講𪜶想足濟辦法，譬如講有一个足趣味的物件，叫做讀報社，譬如講英國發生啥物代誌，美國發生啥物代誌你攏會知，伊閣會買日本的報紙，予逐家知影無仝的觀點，一件代誌無仝的觀點，予臺灣人的智識會當成長，攏免費的。」

臺灣新文化運動紀念館表示，展覽自舊年開幕到今已經欲一年，毋過因為民眾反應袂䆀，今欲閣延長到8/18，現場有設計「記者日誌」手冊、嘛用AI技術重現歷史，館方欲招民眾做伙來了解當時臺灣人追求自由和自治的決心。