黑熊學院佇彰化設基地 宣導資訊戰、避難觀念

這幾冬國際戰爭不斷，加上中國軍機不時就來擾亂台灣，全民國防成做重要的議題，民間嘛有袂少團體，自發性舉辦民防相關的訓練課程，其中民間防衛組織-黑熊學院，初九佇彰化成立基地，會針對軍事知識、資訊戰、避難規劃遮的方面來開課。

黑熊學院執行長朱福銘講：「阮佇全國上受歡迎的課是基礎營的課，基礎營包括軍事普及、認知作戰，猶有急救醫療佮避難規劃等等。」

黑熊學院彰化基地召集人陳素月講：「我感覺講遮的技術佮咱民眾平常時，有當時仔嘛會去拄著的這个狀況，所以咱希望講共遮爾好的課程，帶來地方予咱的民眾會當就近來上課。」

黑熊學院表示，台灣人的危機意識提升，佇舊年已經有四萬人參加過in的基礎訓練營，今年的目標按算會有十萬人，除了建立民防智識、嘛著提防中國的認知作戰黑熊學院課程長沈彥呈就講，「戰爭佮這个災難毋知啥物時陣會來，黑熊學院就是鼓勵咱在地的鄉親攏會使來參加。」

朱福銘表示：「奧運的經驗咱攏提金牌矣，竟然有負面的聲音；台積電是臺灣之光，但是嘛有袂少人會講台積電無啥物了不起？佇阮的觀察遮攏是認知作戰的一部份。」

這陣佇網路資訊流通快速的時代，黑熊學院嘛提醒民眾，千萬毋通無查證就轉發內容，愛有辨識假消息的能力，提升公民自主的防衛能力。