文化奧運看臺灣 牽亡歌陣、歌仔戲上國際舞台

臺灣喪葬儀式當中的牽亡歌陣，登上巴黎文化奧運的國際舞台。擔任法師角色的林宗範，和老婆(lāu-pô)、小旦、尪姨，圍佇香亭四箍圍演出。林宗範佇2016創立"風中燈牽亡歌團"，欲保存牽亡歌的傳統文化佮台語，伊講這改拚出海，予世界通看著臺灣特有的文化，伊真感動。

風中燈牽亡歌團團長 林宗範：「這幾年佇台灣咧拍拚，做這个牽亡歌的推廣，嘛有影誠感動真正拚出海矣。拍拚遮濟年，出海來到法國感覺誠歡喜，予咱世界各國觀眾，逐家會當了解咱臺灣這个誠特別的喪葬的儀式。」

這改林宗範嘛有請"戲曲之神"田都元帥做伙來巴黎，保庇規个演出順順利利，猶閣有攢香火袋予觀眾。另外，這改佇"戲曲新編"的部份，有6个團隊合作演出歌仔戲，5工來已經完成8場表演，總導演汪兆謙表示，無論是靜態的臺灣廟口元素，抑是動態的表演，攏是希望和國際分享「這就是臺灣」。

戲曲新編總導演 汪兆謙：「就是講原底可能你交臺灣有關係，你聽著這你就親像轉來到厝仝款，一定有一寡對臺灣無熟、一聽著這就"啊，這就是臺灣。"其實真簡單，就是想欲分享咱有的精彩的(文化)佮遮的觀眾朋友做伙交流。」

這改歌仔戲"戲曲新編"攏總四齣戲，透過戲齣予國際看著臺灣的民主價值、性別平權和多元族群，歌仔戲的部份已經佇8/2圓滿結束，閣來布袋戲嘛欲上場，欲共臺灣土地的藝術，展現予全世界。