凱米雨量超過莫拉克 高雄25座滯洪池全滿滇

佇鼓山三路遮，規排的民眾用布攄仔欲共水掃出去，車路頂懸也有一堆糞埽，其實透早遮淹水的懸度是到胸坎，這馬的水是退甲差不多，鼓山區25累積的雨量有273毫米，也造成柴山滯洪池無法度承受，居民攏講，過去若無滯洪池，遮是愈gâu淹水，這擺淹水有80公分懸。

民眾：「足久無淹，有滯洪池有差。這馬規个愛河攏滇起來，水嘛無法度排。」

民眾：「水到胸坎遮，水位就是足懸，已經幾若年無淹遮懸。」

凱米風颱帶來的雨量實在足大，高雄119條區域排水佮25座滯洪池，全部攏滿水位，高雄市府表示，山區規工的降雨量，已經超過莫拉克風颱時，有1343.5毫米，市區嘛超過100毫米的雨水量，親像三民區本和里滯洪池的水，透早開始滇起來，雖罔下晡，車路的水攏退矣，毋過滯洪池的水到今猶原是滿的。

臺語台記者 鍾依憓：「高雄市的雨是落規工，柴山滯洪池這馬的水是規个淹起來，高雄市總共25个滯洪池，攏是仝款的狀況。」

高雄市政府水利局局長 蔡長展：「今仔日（25）嘛拄好是天文海漲佮暴潮，嘛拄好拄著親像百年才會有一改的海漲，就是講像愛河欲排出去的水位非常的懸，無法度排出去。」

水利局局長表示講，除了雨量傷大，上主要閣拄著海漲，25个滯洪池頭一擺全部滇起來，才造成市區真濟所在攏淹水，災情嚴重，現場已經加派抽水機，向望水趕緊退。