關廟二仁溪漲大水 南雄橋邊民宅淹半層樓懸

凱米風颱帶來的風雨有影大，眼前這棟透天厝，水淹到半層樓懸，連人欲出來就愛沓沓游才有法度，遮是臺南關廟龜洞里南雄橋参高雄阿蓮交界的所在，因為二仁溪漲大水、致使佇邊仔地勢較低的關廟河段嘛淹甲足嚴重，上低的住戶淹甲1公尺9，家具攏總浸水矣，佳哉人平安無代誌，部份住戶嘛出現停電。

受災戶 陳先生：「透早四點，水就開始入來厝內，然後十點的時陣規个懸度是一公尺，這馬看過去就是一公尺八（記者：所以這馬攏無法度入去就著）無法度，因為有漏電毋敢入去。」

臺南市議員 陳皇宇：「以早無按呢，可能是大流水起來的時陣，規个水攏溢起來，就是風雨傷急矣，所以水溝攏洩袂出去，主要是這个原因。」

為著考量安全，南雄橋、北新橋、新埔橋遮的所在攏暫時封起來。當地的里民講，這擺是莫拉克風颱了後淹上懸的一改。另外，佇三爺溪目前超過警戒水位，致使仁德有濟濟道路嘛攏先封起來，避免有車輛牢咧發生危險。氣象署嘛針對臺南發佈超大雨特報，25到下晡兩點為止，關子嶺、曾文累積雨量已經超過四百毫米。

成大防災研究中心組長 黃志偉：「這个外圍環流大部份攏影響著屏東佮高雄，伊的強度來講，會使達到時雨量50毫米以上，隨著風颱一直向前；無的確這个外圍環流就會閣往北，就是講臺南若受著外圍環流影響，有可能嘛會發生時雨量50毫米以上。」

臺南境內的八掌溪、曾文溪、鹽水溪等主要河川嘛攏漲到警戒區，到中晝為止封路攏總有30條、嘛有超過40座橋梁封起來，中南部的雨勢落續會較明顯，呼籲鄉親嘛是愛注意安全。