根據國安局的統計，對舊年到這馬，已經有51个臺灣人入境中國的時，予中國押去查，人數有增加的趨勢。另外，路透社也報講，有一寡佇中國的外資企業，這馬會煩惱家己的臺灣員工無細膩就違反規定，予中國安罪名，開始有咧諮詢專家的法律意見。
國家安全局局長 蔡明彥VS立委 陳冠廷(2024.07.08):「對舊年到這馬，大概有15个國人，進入陸港澳地區，予中共拘留審判另外有51个國人，佇入境的過程當中，予中共留置詢查，阮感覺案例有增加的趨勢。」
中國舊年制定反間諜法、今年閣有懲戒台獨22條、保守國家秘密法，國安局表示，台灣人入境中國，予留置詢查的數量增加，陸委會6月，也共中港澳的旅遊警示燈號提升到柑仔色。國安局表示，捌佇政府部門作穡、參與公民運動、科技人員風險攏較懸。
國家安全局局長 蔡明彥VS立委 王定宇(2024.07.08):「捌佇政府部門服務過，特別是國安系統，抑是軍警部門，參與相關公民團體活動，可能牽涉對中國自由民主人權的批評，閣來是捌佇高科技產業，牽涉高科技機敏，機敏科技的。」
根據外國媒體路透社報導，因為中國這寡新的規範，有一寡佇中國做生理的跨國公司，煩惱家己的公司、員工，可能無意中踏著中國的紅線，開始諮詢專家的法律意見。法律專家認為，中國一貫的手法就是用無清無楚的法條，限制中國人、威脅台灣人、甚至湠到連外國人的行動佮言論攏想欲控制。
律師桑普講:「這套(方法)一直是中國對香港國安法，佮最近維護國家安全條例，對香港，一模一樣的物件，中國極權的祕密就佇無確定性，伊無可能共規定寫予清楚，這種狀況是創造真懸的無確定性。」
長期關注香港、台灣人權議題的律師桑普表示，中國當咧透過立法、向外宣傳這寡方式，大力推捒「台灣屬於中國的觀點」，而且崁過其它意見的聲音。桑普建議政府，咱愛有方法，仝款大力向外反駁中國的意見，毋通予國際上只賰中國的聲音佮觀點。