臺南大菜市當咧改建 擔頭租貨櫃厝做生理

麵煠好攪醬料，芳貢貢的扁食意麵，濟濟觀光客真興這味，這是本成佇臺南大菜市，也就是西市場的百年麵擔，因為改建工程，這馬是租邊仔貨櫃厝繼續做生理。不而過地主七月底欲討轉去，店家怨嘆講，市府本來答應一冬欲通予in搬轉去市場內，煞無照品照行，這陣欲叫in徙去西門淺草，in認為遐無符合做生理的規格。

民眾，「會感覺淡薄仔可惜，因為驚以後會食袂著。」

店家黃小姐，「生理攏袂bái，若欲搬 人客愛重新閣揣新的位，。」

店家葉先生，「做食的是一定愛三个碗斗咧洗，內面的水若同時放掉，拄才你看著排水彼敢走會離，毋是阮毋轉去，若是in的建築佮總設備達到阮的要求，毋免in來講 阮一定入去的。」

市府會起淺草遮的店面，是煩惱古蹟修護工程影響著店家，這陣有九成的店面是空的，有四个擔位予人佔牢咧，市府回應，五月底會強制要求in搬徙。自治會委員向望老店家到時攏通搬來遮，帶動整個發展。毋過，業者in煩惱搬來搬去影響生理，嘛指控排水系統無做好勢。

臺南市市場處處長王俊博，「市場處遮會做一个檢視，若講確實真正有需要做一寡改善，阮就會做一寡修繕的動作。」

西門淺草市場自治會委員林庭安，「佇遮做17冬矣，目前是無拄著相關狀況，當時設計遮就是為著安置所有市場來的，in的計畫應該有一定的考量。」

大菜市改建工程按算八月底完工，店家擔仔位問題欲按怎辦？市場處表示，工程完成後會開說明會參逐家參詳做討論。