「拉斐爾到梵谷」52幅正本圖 臺南奇美5/2開展

蝴蝶佇草埔咧飛，畫甲真活，予看的人感受著大自然的美好，這幅是真出名的畫家梵谷1890年的創作；另一幅予杜定咬傷的查埔囡仔，是義大利畫家卡拉瓦喬以戲劇性參光線做特點落去畫的。這本成愛佇英國國家藝廊才通看著，這回佮意藝術鄉親真有福氣，200冬來in頭擺來臺灣奇美博物館做展出，來遮一逝，就會當共50位大師的正本看予齊。

本展策展代表蔡海廣，「第一个是有關文藝復興初期，佮盛期的一寡圖，第二个單元是南方，佮北方巴洛克的藝術圖畫，第三單元是18到19世紀，一个壯遊風潮帶來的影像，佮英國畫圖的作品，第四單元就是，逐家定聽著的印象派，真濟大師的作品。」

這擺國際大展，包括有拉斐爾、雷諾瓦、高更佮梵谷等大師，計總用52幅原作，來呈現13世紀到20世紀西洋藝術的重要時期。英國國家藝廊館長指出，in整合濟濟經典作品佇咧遮，打造甲若像縮小版的國家藝廊。五月初十是英國館方兩百週年，IN向望透過遮的多元的藝術精華，予逐家有獨一無二的感受。

英國國家藝廊館長加百列．芬納迪，「過去幾冬真濟亞洲的觀眾，對阮國家藝廊佮西方的繪畫，漸漸咧增加興趣，所以阮想欲回應逐家，另外嘛因為將欲慶祝兩百週年，規个藝廊阮大規模咧做整理，所以嘛才共有機會，共上重要的收藏品帶出來亞洲巡迴。」

亞洲巡迴特展上尾站來到臺灣，這場西洋畫展初二正式對外開展，展期到九月初一，紲落來展品IN會閣提轉去倫敦做展示，嘛留下歷史性的一刻。