「維力」泡麵嘛驗出蘇丹紅 品項、數量對袂起來

彰化縣傳出有三間食品公司，有買著濫蘇丹紅的薟薑仔粉，分別是億品香料、好品味公司佮維力泡麵公司，彰化衛生局稽查了後已經命令業者回收有問題的產品，但是維力泡麵公司的薟薑仔粉，品項數量等等資料煞對袂起來

彰化縣衛生局食品衛生科科長 林毓芬，「這个部份阮閣需要，請高雄市衛生局理清查證，已經有發文予ﰀ確認，ﰀ嘛有收著公文矣，等高雄市調查確認 通知阮了後，會閣進行紲後的處理。」

維力公司代表，「親像阮網站頂懸聲明書講的，阮確實有進，有用著津棧的薟薑仔粉，頭一改使用阮有送驗、阮有提著，第三方公正單位的檢驗報告，關於數量的部份可能愛予，高雄佮彰化衛生局閣確認。」

維力公司初五發聲明參檢驗報告掰會，表示產品原物料攏有檢驗合格，高雄市衛生局回應，違法進口薟薑仔粉的津棧公司，是用海順國際食品的名義出貨，會閣約談海順公司說明，彰化衛生局目前先請業者暫停使用有疑慮的原料

彰化縣衛生局食品衛生科科長 林毓芬，「已經請業者暫停出貨，阮嘛有佇現場做抽驗，會依照紲後的檢驗結果來做處理。」

這改蘇丹紅食安風波愈煏愈大，彰化衛生局表示，偷摻蘇丹紅色素的時機，有可能佇咧種的時陣就透濫佇農藥，或者是洗薟薑仔、薟薑仔絞粉的時陣濫摻落去，攏是為著予薟薑仔粉變紅記記，所以衛生局也提醒民眾，天然的薟薑仔粉，色水、芳味、攏較自然，民眾毋通予紅記記騙去。