嘉義中埔保安宮欲賣 開價1億8千萬揣有緣人

一般民眾來到宮廟，大部分攏是來拜拜求平安，一間宮廟會起起來，嘛佮宗教信仰有關係，毋閣宮廟若是無欲經營，敢會當提來買賣？嘉義縣中埔就有一間廟，透過房仲業者，講欲來賣掉，民眾就誠好奇，廟欲按怎買？

民眾，「廟毋是應該攏誠興，真正無聽過宮廟有咧賣。」

民眾，「感覺誠特別，就是原來廟是會當來買賣。」

民俗專家謝光銘，「廟是較無人咧買賣，一般來講廟是看伊的彼个，廟埕闊度的價值性。」

在地的民眾講，這間廟是私人廟，廟是地主起的，受委託的房仲業者講，廟的土地有一千三百坪，土地是特定農業區，建築物是農舍，若是買起來繼續提來做宮廟使用，除了愛變更土地，閣愛向政府機關申請寺廟登記。

房仲業者何文淵，「因為伊這个土地是農地，這塊土地是農地，目前無做農地來使用，但是只要有納土地產值稅，仝款會當買賣過戶。」

在地人講，因為附近就有庄頭廟，所以在地人較袂來遮拜拜，這馬地主拍算共廟佮地賣掉，而且閣真誠會當買賣，佇地方引起討論，抑若民俗專家是提醒，若經過買賣，未來遮無欲繼續做宮廟，內底的神尊就愛請去別位拜，建議愛處理好勢。