今日「尾牙」興拜土地公 花壇文德宮收兵謝平安

廟埕前鬧猜猜，今仔日是尾牙，土地公廟袂少信眾來參拜，彰化花壇的文德宮，服侍全台灣唯一一位戴烏紗帽的福德老爺，廟方今年依照傳統，舉辦尾牙謝平安活動，嘛有攢平安圓，予民眾享用

煮湯圓志工，「今仔日算尾牙，尾牙就是阿伯仔的生日，欲予逐家食健康的平安圓。」

民眾，「今仔日拜拜、拄好ﰓ囡仔來遮，食平安圓、保平安。」

民眾，「阮拜足濟年囉，頭牙尾牙阮攏有來拜矣。」

人講田頭田尾土地公，台灣民間習俗會佇舊曆初二、十六做牙，拜土地公，其中二月初二頭牙，十二月十六尾牙，會特別盛大祭拜，廟方表示，尾牙佮頭牙較無仝的所在，是會有收兵儀式

文德宮總幹事陳榮昌，「阮就是咧犒賞這个五營兵馬按呢，阮閣有演歌仔戲、猶閣扮仙，感謝土地公伯保庇咱今年一年度內底，平安收成真好按呢。」

彰化花壇文德宮，佇1688年創立，到今已經有三百外年的歷史，廟方閣保留，全台灣唯一的元宵迎燈排活動，整个祭祀慶典，也會對尾牙一路鬧熱到元宵節。