橋仔頭糖廠舊福利社改翻 百年糖業文物展風華

橋仔頭糖廠，有真濟特色建築，這棟白色外觀，面積有四百外坪的建築，誠有日本味，過去遮是糖廠的電影院、醫護所，這馬成做咖啡廳兼展示館，佇門口就囥一座雕像，這座是予人號做白糖之父的新渡戶稻造，過去伊推動臺灣糖業的發展，是奇美集團創辦人許文龍捐予台糖，這馬公開予逐家欣賞。

在地民眾陳志鵬講，「這尊日本話叫做にとべいなぞう，新渡戶稻造，因為這尊其實展示出來，是臺灣白糖的老爸，一般土話是按呢講。」

除了這尊雕像，閣有日本時代留落來的鏡台，充滿西洋風格的圖案，閣有用日本特殊的雕刻法，過去囥佇廠長宿舍，予社長夫人使用，業者共這棟建築租落來，也對糖廠倉庫揣出三件百年古物，這兩座日本時期鏡台佮百年保險箱，真有歷史價值。

頭家娘王秀月也講，「這種叫做井波雕，其實是來自日本，富山縣一種特殊的雕法，到今有兩百幾冬的特殊雕法，佇這个鏡台呈現。」

高雄橋仔頭糖廠是臺灣第一座自動化的糖廠，有百外冬歷史，這馬業者將古物展出，予民眾那歇睏那啉咖啡，也會當欣賞百年糖廠文物。