國影中心數位修復10週年 展出10齣修復電影

國家電影中心一直攏真拍拚咧做影視資料的典藏、保存和修復，10/27是「世界影音遺產日」，今年也拄好是中心數位典藏、修復業務的十週年，特別舉辦修復成果發表會，今年度計共修復10齣電影，其中上重要的，就是林福地導演的臺語片「夕陽西下」佮「琉球之戀」，較可惜的是目前干焦揣著華語配音的版本，文化部和國影中心也答應欲共重新配音做臺語版本。

國家電影及視聽文化中心董事長褚明仁說明，「這是第一支的彩色臺語片，應該共復原轉來，配音配轉來臺語的，咱真正欲做，，所以這馬真正欲做，拄仔咱文化部王時思次長嘛有講，所以開始欲來選角色 欲來揣，蔡振南、南哥出面喝聲，用咱上優美的臺語的方式，來共復原轉來。」

林福地往過捌拍過的電影作品上無就60部，後來煞連一部也強欲揣無。2019年意外佇咧美國舊金山的老戲院的戲台跤揣著「夕陽西下」佮「琉球之戀」的拷貝帶，國影中心共做數位修復，閣邀請導演林福地和當年的演員周遊來到現場。

藝人周遊和翁婿李朝永表示，「大都影業火燒厝，共咱的作品燒了了，林導演的戲攏佇遐沖印，伊的戲也無矣、上冤枉，攏無去矣。」

導演林福地也講，「臺語片最後的兩部戲，所以毋知影有好看無，我都毋捌看過，我家己攏驚驚，我彼陣仔到底是按怎拍的。」

影音修復毋但是和時間走相逐的比賽，也修復濟濟影視工作者當年的夢想，嘛予咱認捌家己的歷史文化。國影中心自27至29辦一系列的活動，其中就包括「夕陽西下」佮「琉球之戀」，欲邀請民眾做伙來看臺語片時代的珍貴資產。