第12屆總統文化獎頒獎典禮，佇17下晡舉辦，這擺的著獎人，有來自歌仔戲界的廖瓊枝老師、結合傳統文化佮當代藝術的張徐展、推動新住民人權的南洋姐妹會、傳承傳統藝術的噶瑪蘭族發展協會，落尾閣有20外年來注心咧環境議題的公視節目「我們的島」，tshuā觀眾朋友來看in對文化的貢獻。（此則新聞標題、導言、內文皆為臺語文。）
總統文化獎頒獎典禮，濟濟歌仔戲後輩，做陣牽歌仔戲第一苦旦--廖瓊枝上台，伊一世人注心咧歌仔戲演出，也深入社區傳湠歌仔戲，得著文化耕耘獎。
文化耕耘獎得獎人廖瓊枝，「希望咱臺灣歌仔戲、在地的藝術，會當久久長長發展落去，在此並再次為傳統歌仔戲，會當繼續保存。」
台灣民間信仰，若親人過身、辦喪的時、會燒紙厝這寡物件，藝術家張徐展以傳統糊紙文化、結合當代藝術，變做影片，得著青年創意獎。
青年創意獎得獎人張徐展，「我有幾个作品是包含非常在地的生活，親像佇菜市仔會看著的，扁去的死鳥鼠，也是我的作品之一，伊是用紙糊的重現，以鏡頭、予大眾關注環境議題」公共電視的節目「咱的島」，20幾年來、千外集節目，深入台灣每一角勢，☒觀眾關注環境，得著社會改革獎。
社會改革獎得獎人 公視我們的島製作人 于立平，「咱也真煩惱，有真濟無公義的環境政策當咧發生，政策的選擇上，定定環境、生態、土地佮社會弱勢，是予人犧牲的，這是猶未結束的戰爭。」
抑若臺灣有濟濟來自東南亞的新住民人口，但是定予人歧視，南洋姐妹會踮佇台灣欲30年，做消除歧視的工課，也推動改革，得著人道奉獻獎。閣有噶瑪蘭族發展協會佇花蓮傳承噶瑪蘭族強欲失傳的技術，用弓蕉絲做出一匹一匹布，得著在地希望獎。總統蔡英文講，這寡得獎人來自無仝背景，但是攏咧展現台灣多元文化，深化台灣文化內容，攏是值得尊敬的對象。