臺史博「當我們望春風」 多元歌韻唱出臺灣文化

用老歌手純純、文夏佮紀露霞的相片，結合現代AI的技術，重現一代歌王歌后演奏望春風過去唱歌迷人的形影，予聽甲耳仔覆覆，真數念。臺灣經典民謠-望春風對1933年傳唱到今90冬，隨著時代的演變，有真濟人改編佮演唱過，這改臺灣歷史博物館以望春風做主題，欲予民眾會使聽著臺灣歷史留名的這首歌。

民眾表示：較深的印象是，逐改對美國欲坐飛行機轉來的時陣，坐某一間的航空公司，就聽著伴奏的音樂。

也有其他民眾：原本是一條足舊的歌，猶毋過會使有足濟無仝款的風格，足特別的。

由音樂人鄧雨賢佮李臨秋創作的望春風，歌詞寫著男女感情佮世間的向望，家家戶戶攏聽過嘛會曉唱，所以嘛予人號做是地下國歌。展覽中，除了展示出當年創作的手稿，甚至蒐集80種望春風錄音的版本，兼設互動裝置。館方表示，這首歌代表著近代臺灣一部文化史。

臺史博研究助理蕭軒竹說明：利用一首歌無仝時期的變化，來看一首歌佇無仝時期，伊配合流行音樂的改變，閣有時代需求的改變。到底有啥物變化？同時咱嘛會當對一首歌。去看著臺灣社會的變化。


這个展覽到11月12，民眾會當用聽覺感受臺灣流行音樂的歷史演變，觀察無仝翻唱的版本的意境變化。館方講，向望這首優雅的經典民謠，會使世世代代流傳落去。