酷兒是性少數群體的代稱，抑若科學佮性別交織的藝術品，會生做啥物模樣？臺北教育大學北師美術館對7/22開始有推出「酷共生」，有濟濟作品欲予逐家看著藝術家、科學家、佮各種行動者合作出來的藝術品生啥款。（此則新聞標題、導言、內文皆為臺語文。）
這寡藝術品，是用科學佮性別故事交織，成做主題的展覽，這个展覽號做酷共生。拍開人類和其他生物的起點，就是運用生物圖像。藝術家劉玗表示，伊這改的創作理念，是共一个青盲的科學家，透過其他的感官，共這寡生物的模樣寫落來，劉玗就共伊實際畫出來。
藝術家劉玗表示：青盲的博物學家所書寫的這寡生物，因為這寡書寫真有文學性，所以咱若像會使，重新看著這寡生物，但是完全無法度去想像，這寡生物是啥物？所以我重新共這寡生物畫出來。共生嘛講著和主流社會性別認同無仝的部份，中國南方有狀元紅、女兒紅，藝術家狸貓換就運用queer代表的紫色，做出一款號做紫待的酒，這款酒是用紫色的酵母菌落去發酵。
藝術家狸貓換，也說明他的創作理念：檢采有一寡人伊的性別認同，無一定是查埔抑是查某，in毋是後生 抑毋是查某囝，我就想講假使會使採用酷兒文化內面，定定看著的紫色色彩，共伊激做紫色的酒所以這个「紫待」就是紫色的等待，和囡仔彼个子代offspring這个字。
北師美術館舉辦酷共生展覽，展出11組臺灣當代藝術家的作品，展期對7/22開始到9/17，希望對這个展覽當中，會使看著生物和性別的多元，嘛去理解、接受社會上的性少數族群。